Մոլդո-Աշուն Ղրղզստանի ամենաարկածային լեռնանցքներից է․ այն հայտնի է անցման դժվարությամբ ու պարգևած սուր զգացողություններով։ Այն սիրված է թե՛ հեծանվորդների, թե՛ մեքենա վարելու սիրահարների շրջանում։ Լեռնանցքը հատկապես հայտնի է յոթ մակարդակով ձգվող ոլորապտույտ ճանապարհով, որը գրավում է ադրենալին ու սուր զգացողություններ փնտրողներին։
Նարինի մարզում գտնվող Մոլդո-Աշու լեռնանցքով անցնող ճանապարհը տանում է դեպի հանրահայտ Սոն-Կուլ լիճ։ Մոտ 3243 մ բարձրությունը Տյան Շանի ու Պամիրի լեռների համար գուցե սովորական է, բայց լեռնանցքը հաղթահարելը հեշտ չէ։ Կտրուկ վերելքը հաճախ ծածկվում է ամպերով կամ խիտ սպիտակ մառախուղով, և ամեն շրջադարձ անսպասելի բացահայտում է բերում։
Շատ ճանապարհորդներ Մոլդո-Աշուն համարում են Ղրղզստանի ամենագեղատեսիլ լեռնանցքներից մեկը։ Վերևից երևում են ձյունածածկ գագաթներ, բարձր եղևնիներով պատված լանջեր ու ծաղկած հովիտներ։ Բլուրների միջով ոլորվող լեռնային առվակներն ամբողջացնում են այս գեղեցիկ տեսարանը։







